Цагдаагийн нэгэн ажилтан юу ярьсан тухай, бас ямар тэмдэглэл хөтөлсөн тухай хэвлэлээр цухасхан гараад авсан. Бодвол долдугаар сарын нэгний тэр шөнө болсон явдлыг, хамгийн гол нь энгийн иргэдийг дөрөв таваар нь буудан хороосон үйлдлийг хүлээн зөвшөөрөөгүй тэр цагдаа, хожим хэрэг болно хэмээн үзээд тэмдэглэл хөтөлсөн биз ээ. Тэмдэглэлд "Манай дарга мөн мэргэн буудаж байна аа" гэж хэн нэг нь дуу алдсан тухай дурдсан бололтой юм. Тэр "мэргэн буудагч" хэн болоо. Зарим эх сурвалжийн хэлэхээр бол хурандаа Батсүх л болов уу гэх.
Энэ бол батлагдаагүй сураг шүү. Харин "Ам нээвэл уушги нээ" гэж тэмдэглэл хөтөлсөн цагдаа үгээ хэлэх л байлгүй. Хэлсэн учраас хэрэг эргэж шалгагдаж байгаа ч юм билүү. Гэхдээ Батсүх хурандаа зарим хэвлэлд өгсөн ярилцлагадаа "Би ч гэсэн дээрээ даргатай" гэсэн санааг удаа дараа хэлээд авсан нь бий. Ухаандаа хардаж болох хүний тоо таван хуруунд багтаж байна гэсэн үг. Ерөнхийлөгч асан "буудах тушаал өгөөгүй" тухайгаа олон удаа хэлсэн. Цаана нь дөрөв үлдэнэ. Батсүхийн хэлснээр бол дээд дарга (үлдсэн дөрвийн нэг байж таарах нь) "мэргэн буудах" тушаал өгсөн болохыг л тойруу замаар хэлээд байсан юм биш үү гэмээр. Энэ мэтчилэн олон бодол хүн бүрийн л толгойд эргэлдэж байгаа. Тавын таван хүний алтан амь эрсдэж, тэднээс дөрвийг нь машинаар хөөж байгаад буудан хороосон байтал гэрчлэх хүн нэг ч олдохгүй байна гэвэл хүн итгэх үү. Тэр тусмаа шалгаж байсан прокурор Б.Галдаа нэгэнтээ "цагдаа буудсан баримтууд хангалттай байгаа" гээд хэлчихсэн байхад шүү. Тухайн үедээ хэргийн эзэн бараг л олдчихсон мэт л ойлгогдож байсан. Тэгсэн өдгөө юу болсон юм бүү мэд. Нөгөө шударга прокурор Б.Галдаа маань нэг л эргэлзэж тээнэгэлзсэн ч юм уу, эсвэл дарамт шахалтанд орсон ч юм уу сонин үг өгүүлбэр амнаасаа унагаасан бололтой. Цагдаагийн дарга асан нэгэн эрхэм хэн нэгнийг "устгах" захиалга өгч байсан тухай цагдаагийн хурандаа хүнээс сонсож байсан юм даг. Тухайн үедээ итгээгүй учир ил гаргаагүй юм. Одоо бол оргүй ч биш мэт санагдах болсноо нуух юун. Иймэрхүү л байдалтай "Долоон сарын нэгэн" гурав дахь ойтойгоо золгож байна. Хар ухаанаар бодвол амархан л олдчихмоор хэрэг шиг. Онц байдал зарласан Ерөнхийлөгч, байраа шатаалгасан намын дарга бөгөөд Ерөнхий сайд, онц байдлыг хариуцан ажилласан ХЗДХ-ийн сайд гурав дээр цагдаагийн гурван дарга. Эхний гурвын дотор "чиглэл өгөгч", дараагийн гурав дотор" тушаал буулгагч" байгаа шүү дээ. Дээр өгүүлсэн тэмдэглэл зэргээс харвал "мэргэн буудагч" сүүлийн гурав дотроос тодорч байх шиг. Ямар боловч хав дарагдаад, бараг цайрах тийшээ алсарч байсан ноцтой хэрэг, шинэ прокурорын өнгөн дээр дахин шалгагдах нь тодорхой болов. Цэл залуухан үрсээ буудуулсан эцэг эхийн сэтгэлд ужгиран буй гомдлыг бага ч атугай нимгэлэх шийдвэр гараасай билээ. Сонсоод байх нь ээ нотлох баримтууд цөөвтөр л бололтой. Жишээ нь хэргийн газраас 35 ч билүү хонгио олдсоны хориод нь цагдаагийн бууных ч гэх шиг. Бусад нь хэнийх болж таарахнав.
Буутай энгийн иргэд бас буудаад давхиж явсан болж байна уу. Тэр шөнө юун 35 гэхээр олон буудсаныг олон хүн гэрчлэнэ дээ. Тэр олон сумны хонгиог шөнөжин түүлгэсэн тухай яриа явдаг. Юуны учир, хэн тушаал өгч түүлгээ бол. Бас үүр цайхаас өмнө амжиж амиа алдагсад болон шархдагсдын цусыг яаравчлан цэвэрлүүлсний цаана юу нуугдаж үлдээ бол. "Муусайн юмнуудыг ёстой тарвага шиг хөөж байгаад буудлаа шүү" хэмээн онгирсон цагдаагийн тухай иргэний өгсөн мэдээлэл байдаг. Энэ үнэн бол "мэргэн буудагч"-ийн үлгэрлэлд хөөрсөн цагдаа ганц нэгээр зогсохгүй байх гэж бодохоор.
ЗАРИМ МЭДЭЭЛЛИЙГ ЭРГЭН САНУУЛАХУЙ
Шинэ мэдээлэл биш л дээ. Жил гаруйн өмнө мөн л "Долоон сарын нэгэн"-ний өдрийг тохиолдуулан бичигдэж байсан баримтууд ч бий. Түүхэнд тэмдэглэгдэн үлдсэн "цуст ням гариг"-тай л адилтгах хэрэг "Долоон сарын нэгэн" мөн байх. Хэдэн жилийн өмнө Тань Ань Миней талбайд жагсагчдыг танкаар няц дарсны шөнө газраар нэг асгарсан цусыг кока колагаар угааж цэвэрлэсэн гэдэг юм билээ. Цус ор мөргүй арилсан ч хэрэг мартагдаагүй. Харин ч эсрэгээр Бээжинд очсон хүн бүр энэ талбайд очиж эмгэнэл илэрхийлдэг жишиг тогтсон гэхэд болно. Ийнхүү тухайн үед иргэдээс ирж байсан зарим мэдээллийг товчлон хүргэсүү.
2008.07.03. Нийслэлийн АН-ын ажилтан ...
Манай ажилтан М-ийн ах хөдөөнөөс ирсэн байсан юм. 23 цагийн үед хоолны мах авах гэж гарч яваад буудуулсан байна. ГХЯ-ны тэнд цагдаа нарт буудуулж нас баржээ. Мөнх-Эрдэнэ гэж 27 настай залуу. Дорнод аймагт цагдаа байсан. Хотод ирээд Толгойтод авсан байрандаа засвар хийж байсан хүн. Хадам ээжээ тосож аваад дэлгүүр орохоор явсан гэсэн. Гэр бүлтэй, нэг хүүхэдтэй. Өвөрт нь иргэний үнэмлэх нь байсан юм байна. Хүзүү хавьдаа буудуулсан. Ахынх нь утас: 997906..., 981444... Баахан хүн барьж хүлээлгэнд хорьсон байна. Хүмүүсийг зодож, дарамталж байгаа тухай мэдээ ирсэн. Өөр хүмүүс алагдсан тухай ч мэдээ ирлээ ...
2008.07.03. Иргэн Э, Утас: 996337..., 990957...
Миний ах Э.Доржсүрэн 24 настай. "Мейжик" гэж Канадын компанид орчуулагч хийдэг байсан юм. Өчигдөр шөнө 20 цаг хагаст ажлаасаа тараад гуравдугаар хороололд танилындаа очиж телевиз үзэж байгаад 21 цагийн үед явсан байсан. Тэр үед цагдаа нар зам хааж байсан гэсэн. ГХЯ-ны урдхан явж байгаад дүүтэйгээ таарсан байна лээ. Тэгэхэд буудаад байгааг хоёулаа сонсоод зогсож байсан чинь цагдаагийн машин гарч ирээд дотроос нь хүмүүс рүү шууд буудаад байхыг харсан. Дүүдээ 1000 төгрөг өгч явуулаад өөрөө өөр тийш явсан гэсэн. Тэгсэн 01 цаг 40 минут орчим хүзүүндээ буудуулж нас барсныг өнөөдөр мэдлээ. Араас нь бүх гэрлээ асаасан жийптэй хүмүүс хөөж буудсан гэж гэрчүүд ярихыг сонслоо.
2008.07.03. Иргэн М. Утас : 992375..., 966638..., 880906..., 886663..., 998567...
Манай дүү Ц.Энхбаатар 36 настай. Хувиараа бизнес эрхэлдэг хүн байсан. Эхнэр нэг хүүхэдтэй. Дорнод аймгийн харьяат. Өчигдөр шөнө ГХЯ-ны тэнд явж байгаад бөөрний тус газраа буудуулж, уушги нь задран нас барсан байна. Цагдаа нар хөөж буудсан гэж сонслоо.
2008.07.04. Иргэн Г.Б. Утас: 888402...
...Өчигдөр 200 гэсэн дугаараас утасдаад танай хамаатан нас барсан байна. 35 орчим настай хүн. Ирж зургийг нь үзээч гэсэн. Тэгээд удаагүй байтал энгийн хувцастай хоёр хүн машинтай ирээд архичин гэмээр хүний зураг үзүүлсэн. Манайд ийм хамаатан байхгүй гэсэн чинь бүх бичиг баримт хурааж аваад, ээжийгээ гэртээ үлдээ гээд дагуулаад явсан. Эрүүгийн цагдаагийн газар аваачаад "Чи хэний хүн бэ. Тэрийгээ хэл. Камерт чиний бичлэг байгаа. Найман жилийн ял өгнө гэхчлэн сүрдүүлж, Магнайгийн, эсвэл Жагаагийн хүн гээд хэлчих гээд дуугүй байхаар цохихоор үе үе гар далайж байсан. Тэгж байснаа чамайг хүнтэй нүүрэлдүүлнэ гээд гаднаас нэг залуу оруулаад ирсэн. Би урд өдөр жагсаал болох үед талбай дээр хүмүүсийн дунд хараад л зогсож байсан юм.
Тэгсэн гурван залуу ирж танилцъя гээд гар барьсан, утасны дугаар авсан. Хүмүүс МАХН-ын байрны тийш явж байсан үе. Нөгөө гурвын нэг нь хүмүүсийг турхирч хашгираад л. Их тэнгэр рүү дайръя. Баярын гэрийг шатаая, устгая гэхчлэн орилоод байсан. Харсан чинь өчигдөр надтай танилцсан, орилоод байсан залуу байсан. Нөгөөх чинь эрүүгийн төлөөлөгч юм байна.
Хамтраад намайг байцаасан. Тэр нөхөр "Чамайг би мэднэ. Баярын гэрийг шатаана гэж чи хашгирсан гэж тулгаад. Би утсаар гэр рүүгээ ярья гэсэн зөвшөөрөөгүй.
Тал талаас зэрэг зэрэг байцаагаад "Сонгуульд хэний төлөө санал өгсөн. Аль намынх, жагсаалыг Ардчилсан Нам зохион байгуулсан биз дээ гэхчлэн шахаад. Байцаагч нар халамцуу байх шиг байсан.
Яг зодох гэж байтал ашгүй ээж маань ирчихсэн, шагайгаад "Наад хүүхэд чинь тархины гэмтэлтэй. Унадаг юм" гэж байж болиулсан. Сүүлдээ нөгөө хэд чинь "Хамарч ажиллана. Жагсаалд оролцсон хүмүүсийн тухай мэдээлэл олж ир" гэхчлэн аяглаж байгаад дахин дуудна гээд явуулсан. Байцаагч нь Батхүү гэсэн байх. Утас нь: 99194438, 55253925
2008.07.04. Б.М. 24 настай. "Боловсрол" дээд сургуульд багш. Утас: 998916...
Ард кино театрын тэнд явж байсан чинь машинтай цагдаа нар ирээд шууд баривчилсан. Тэгээд нэг газар аваачиж зөндөө зодож дарамталсан. Баригдсан олон хүн тэнд байсан. Бүгд л зодуулсан. Бороон дунд, халуун наранд гадаа суулгаад, яг л кинонд гардаг шиг. Эхний өдөр уснаас өөр юм өгөөгүй. Хоёр дахь өдөр тал өгсөн. Миний бичиг баримт бүрэн байсан болохоор гурав хоноод гарсан. Харин анх хурааж авсан түрийвч, цаг зэрэг бусад зүйлийг маань өгөөгүй. Ер нь хүмүүсээс юмыг нь хурааж аваад л газар шидээд байсан. Яагаад зүгээр хүмүүсийг ингэж тамлаад байгааг лавласан чинь "Улс бидэнд эрх өгсөн юм. Яасан ч бидний дур" гээд цохиж байсан. Тэнд хүүхдүүд ч байна лээ.
2008.07.04. С.Билгүүн. Утас: 991881...
Би энэ сумны хонгиог Багшийн дээдийн дэргэдэх автобусны буудал хавиас оллоо. (Батлан хамгаалах болон цагдаагийн офицерууд л эзэмшдэг Макаров гэх гар бууны сумны хонгио өгөв О.Ш)
2008.07.04. Хүчитбаатар. Магнайгийн сонгуулийн менежер:
Батзанданг өнөө өглөө баривчилж Ганц худагт хорьсон гэж дууллаа. Хуулийн зөвлөх Баясгалан ингэж хэллээ. Хэлмэгдүүлэлт болж байх шиг байна. Ардчилсан Намын зүгээс ямар нэг асуудал тавих эсэхийг мэдэх гэсэн юм.
2008.07.05. Иргэн Ё.Долгормаа Утас: 998006...
...Жагсаал болох өдөр таксигаар МАХН-ын байранд ирсэн. Олон хүн тайван жагсаж, цагдаа нар намын байрыг хамгаалж байсан. Үүдэнд зогсож байсан хошуучаас гуйж байгаад хоёулаа дотогшоо орсон. Дарга нартай нь уулзаж сонгууль булхайтай болсныг л хэлэх гэсэн юм. Нэг хүүхэнтэй тараад дарга нарыг нь асуусан. "Та нар аль намын хүмүүс вэ" гэж байна. АН-ыг дэмждэг гэчихсэн чинь учиргүй хөөгөөд "Та нар АН-аас ямар авлига авсан" гэхчлэн хашгичаад байсан. Удалгүй л бужигнаад эхэлсэн шүү.
2008.07.07. Баярмаа:
"Улаанбаатар" зочид буудлын тэр хавиас хоёр хонгио оллоо. (Нэг нь АК бууны, нөгөө нь резин сумны хонгио байсан О.Ш)
2008.07.07. Иргэн Н. Утас 911996...
Батзаяа гэж 16 настай хүү. Цагдаа нарт долоон сарын нэгний шөнө буудуулсан. Гэмтлийн эмнэлэгт мэс засалд ороод биенээс нь сум авсан. Гэмтлийн зургаан давхарт хэвтэж байна. Өөр бас нэг буудуулсан хүүхэд тэнд байгаа. Дунд чөмөг нь хуга буудуулсан байна лээ.
2008.07.07. Цагдаагийн ажилтан Н.
Танай намын байрны хавиар эрүүгийн гэмт хэрэгтэн хоёр гурван хүн эргэлдээд байна. Юу ч хийж магадгүй хүмүүс шүү. Уг нь арван жилийн ялтай шоронд сууж байгаа ялтан. Миний мэдэхээс Паниг хочтой Батжаргал 10 жилийн ялтай, нөгөө нь Өмнөговийн Батжаргал гэгч мөн л 10 жилийн ялтай. Бас 120 мянгатын "сахал Баба" гэж эрүүгийн элемент ч явж харагдана лээ. Болгоомжтой байгаарай.
2008.07.19. Хурандаа Ж.Г.Цагдаагийн академид багш:
Галын байгууллагад 30 жил ажилласан. Энэ долоон сарын 13-нд гэнэт ажлаасаа халагдлаа. Надтай хамт галын байгууллагад 14 жил ажилласан Д.Хишигбаатарыг долоон сарын нэгний өдөр халж тэтгэвэрт нь суулгах шийдвэр гэнэт гарсан байсан. Өчигдөр УИХ чуулган хараад олон зүйл бодлоо. Долоон сарын нэгний галыг ажигласаан. Оросын элчингийн тэнд явж байтал тэндхийн цагдаагийн ажилтан "Цаана чинь хүн алах нь байна шүү" гэж хэлж байсан. Тухайн үедээ анзаарсангүй. Би галын байгууллагад 30 жил ажиллахдаа гал гарсан газар галын машин ирчихээд дусал ч ус цацалгүй шатааж дуусгасан тохиолдлыг мэдэхгүй юм. Шөнийн 03 цаг болж байхад яагаад ус цацахгүй байгааг лавласан чинь Уран зургийн галерейн галыг унтраасны дараа урагшаа ор гэсэн гэж нэг нь хэлж байсан. МАХН-ын байр бол тийм ч амар шатаад байхаар байр биш шүү дээ. Сүүлд өрөөнүүдээр ороход ихэнх өрөө огт шатаагүй байна лээ. Харин Уран зургийн галерей бол шаардлага хангаагүй байр. 2005-2006 оны үед байх. Тэр байрыг хүлээж авахад нь манай байцаагч комиссын гишүүний хувьд галын шаардлага хангаагүй байр гээд хүлээж авах актанд гарын үсэг зураагүй юм. Дан модоор шахуу барьсан байр шүү дээ. Тэр үед манай дээд дарга УИХ-ын гишүүн Хүрэлсүх байсан. Нөгөө байцаагчийг дуудаж загнаад, гарын үсэг зурахгүй бол ажлаас чинь хална, энэ тэр гэсээр албаар хүлээж авсан гэхэд болно. Сайн шалгавал их зйл байгаа болов уу. Би галын үед шөнийн 01 цагаас маргааш өдрийн 15 цаг хүртэл ажилласан.
2008.07.21. Зураач О. Утас: 990150...
МАХН-ын байр Дуурийн театр хоёрын дундаас хоёр хонгио оллоо. (Нэг нь АК бууны сургуулийн сумны, нөгөө нь байлдааны сумны хонгио байв О.Ш) Надад "Сони" камераар авсан бичлэг байгаа. Хэрэгтэй бол өгч болно. Долоон сарын нэгний шөнө миний танил зураач Марта найз бүсгүйтэйгээ болж буй үймээнийг сонирхож яваад цагдаа нарт баригдсан. Телевизээр баригдсан хүмүүсийг гаргахад тэнд байгаа харагдаж байсан. Хоёулаа зөндөө зодуулсан, хөх няц болсон сорви байгаа гэж байна лээ.
2008.07.21. Иргэн Н. "УБ Эрдэм" сургуулийн захирал:
Манай нэг багш Л.Т. жагсаалын үед тэнд явж байгаад болсон явдлыг харсан байна лээ. Цагдаа нар баривчилсан хүмүүсээ СТӨ-ний доод талд оруулж хориод зодож байхыг харсан байгаа юм. Тэгсэн нэг жагсагч түүнийг харчихаад "Манайхныг энд зодож байна" гэж хашгирсан. Тэгээд л хүмүүс тийшээ дайрч зодоон, цохион болсон юм билээ.
2008.07.27. Нэрээ нууцалсан эх сурвалж:
Жагсаалын шөнө би тэнд байсан юм. Надтай хамт тэнд зогсож байсан хэд хэдэн энгийн хүмүүс энэ явдлыг харсан шүү. Өнөө бамбай барьсан цагдаа нарын ард Эргүүл хамгаалалтын газрын дарга дэд хурандаа Мягмаржав нуугдаад жагсагчид руу чулуу шидээд, бусад цагдаа нараар шидүүлж байсан.
2008.07.29. Иргэн Б. Утас: 990085...
Саявтархан цагдаагийн газраас усанд живж нас барсан хүний тоо 70 гарсан гэж мэдээлж байсан. Тэдний заримыг байж магадгүй цагдаагийн сургуулийн хэдэн сонсогчоор нэг газар булуулсан байна лээ. Сонсогч нарыг сонгож аваад нууцыг хадгалах тангараг өргүүлэн гэсэн. Цогцсуудыг булж байхад ихэнх нь зодуулсан, буудуулсан байж болзошгүй сорвитой байсан гэж ярихыг сонссон. Саяын жагсаалын үеэр буудуулсан хүн тав биш байж магадгүй.
2008.07.31. Иргэн Б. Утас: 911502...
Долоон сарын нэгний шөнө барилга дээр ажиллаж байгаад 22 цаг өнгөрөөд талбай дээр ирсэн. Дуурийн театрын орчим буун дуу тачигнаад байсан. Уг нь шөнөжин ажиллах байсан ч онц байдал зарласан тухай телевизээр сонсоод ажлаа зогсоосон юм. Төв зам дагуу явж байсан чинь гэнэтхэн цагдаагийн маяктай машин, бас арай том хар машин хоёр багшийн дээдийн тэндээс гараад ирсэн. Тэнд байсан хүмүүс цагдаа ирлээ гээд чулуу шидэцгээж байсан. Нөгөө хоёр машин буцаж явснаа гэнэтхэн эргэж ирээд шууд буудаж эхэлсэн. Би замын хажуугийн хайс даваад хэвтэж нуугдаж байгаад чимээ намдахаар босож харьсан. Хүн буудсан газар зөндөө цус нэлийсэн байсныг Х гэж хүн камераар бичиж авсан байх.
2008.07.31. Иргэн Х.
Тэр шөнө гэдсээрээ буудуулсан нэг хүн гэртээ хэвтэж байна. Цагдаатай уулзсан гэсэн. Их айлгасан юм шиг байна лээ. Хувиараа боолт хийлгээд байж байна. Шаардлагатай гэвэл уулзуулж болох юм. Ээж нь манай гэр бүлийн хүнтэй хамт ажилладаг юм.
2008.07.31. Иргэн Л.
Ганц худагт миний таних зургаан оюутан хоригдож байна. 20 гаруй оюутан гадуур байцаагдаж байна. Миний танил нэг оюутны аав эргүүлийн цагдаа хийдэг юм. Тэр шөнө гудамжинд нэг цагдаа хүн бороохойдож байхад тааралдаад "Болиоч" гээд хэлчихсэн чинь эргээд өөрийг нь цохиод унагасан. Унахдаа цамцнаас нь татсан чинь погоон нь ханзарчихаж. Тэгсэн шууд баривчилсан байна лээ. Тэр оройдоо зөндөө зодуулсан гэсэн. Газар мөлхүүлээд байсан гэнэ. Одоо нил хөх няц.
2008.07.31. Иргэн А.
Манай хамаатан ах цагдаа хийдэг юм. Нийслэлийн цагдаад л ажилладаг. Тэр шөнө гэртээ их омгорхуу ирээд "Муусайн юмнуудыг ёстой тарвага шиг буудлаа" хэмээн хөөрцөглөж байхыг сонссон. Шөнө талбайд хүн хөөж буудсан гурван машины нэг нь хар өнгөтэй "Делика" байсан.
Жич: Дээр бичигдсэн мэдээллүүдийн талаар Улсын прокурорын дэргэдэх Мөрдөн байцаах газарт гурвантаа мэдүүлэг өгсөн бөгөөд, иргэдийн авчирч өгсөн сумны хонгионуудыг тоо ёсоор хүлээлгэн өгсөн болно.
No comments:
Post a Comment